کارەکانی یانەی هەولێر هەڵدەپەسێردرێت

ئاڤا سپۆرت

لێژنەی ئۆڵێمپی عێراق بە نووسراوێکی فەرمی داوای ڕوونکردنەوە لە یانەی هەولێر دەکات و لە ئێستادا کارەکانی ئەو دەستە نوێیەی ڕاگرتووە.

وێنە گەورەکە: لێژنەی ئۆڵێمپی عێراق بەهۆی سکاڵای ئەندامێکی پێشووی دەستەی کارگێڕی، کە داوایکردووە لێکۆڵینەوە لە هۆکاری لادانی ئەو لە دەستەی کارگێڕی یانەکە بکەن، کارەکانی ئەم دەستەیەی هەڵپەساردووە.

لێدوانی فەرمی: سەردار ئیسماعیل بەڕێوەبەری گشتی وەرزشی کوردستان، لە وەڵامی نووسراوەکەی لێژنەی ئۆڵێمپی بە ئاڤا سپۆرتی ڕاگەیاند، کە بەهیچ شێوەیەک حساب بۆ ئەم نووسراوەی لێژنەی ئۆڵێمپی عێراق ناکەن و سێ مانگی دیکە بۆ ئەم دەستەیە درێژدەکرێتەوە.

زانیاریی زیاتر: ماوەی سێ مانگە گۆڕانکاریی لە دەستەی کارگێڕی یانەی هەولێر کراوە، بەڵام چەند ڕۆژێک بەر لە ئێستا ئەندامێکی پێشوو سکاڵای لە لای لێژنەی ئۆڵێمپی عێراق تۆمارکردووە.
باکگراوند: هەولێر لە 1968 دامەزراوە، تا ئێستا 4 نازناوی خولی نایابی عێراقی بردووەتەوە و دوو جار گەیشتووەتە یاریی کۆتایی جامی یەکێتی ئاسیا.