بەڕازیل هێشتا لە ژێر سێبەری نەیمارە

زۆر شت هەیە باس بکرێت لەسەر نەیمار و کاروانی وەرزشی نەیمار، یاریزانەکە ئێستا 32 ساڵە و لە ئابی ساڵی ڕابردوو لە پاریس سانجێرمانەوە ڕوویکردە هیلالی سعوودی، دواتریش دووچاری پێکانێکی سەخت هات و ماوەی نۆ مانگە یاریی نەکردووە. 

 

لەو ساتەوەی نەیمار دوایین یاری بۆ بەڕازیل ئەنجامداوە، 15 یاریزانی جیاواز یەکەم یاریی خۆیان بۆ بەڕازیل کردووە و چەندین گۆڕانکاری بەسەر هەڵبژاردەکەدا هاتووە، ئێندریک ئێستا ڕزگارکەری تیپەکەیە، ڤینیسیۆس پیاوی یەکەمە و ژمارە 10ی نەیماریش دراوە بە ڕۆدریگۆ. 

 

ئەمانە هیچی گرنگ نییە، چونکە دەبینین تاوەکو ئێستا نەیمار کاریگەری لەسەر هەڵبژاردەکە هەیە، چاوپێکەوتنی یاریزانەکانی هەڵبژاردەکەیە، باسی نەیمار دەکەن، چاوپێکەوتنی ئەفسانەکانە، باسی نەیمارە، میدیاکان و ڕۆژنامەنووسەکان چەندین گوتاریان لەسەر نووسیەوە، تەنانەت زوومی کامێرەکانی نێو یاریگاکان لە کاتی یارییەکانی بەڕازیل لە کۆپا ئەمریکا لەسەر نەیمارە. 

 

بینیمان کە نەیمار چووە هۆڵی ڕاهێنانەکانی هەڵبژاردەی بەڕازیل و ڕاهێنانەکانی خۆی ئەنجامدا، لە کاتێکدا بانگێشتی هەڵبژاردەکە نەکراوە، هەروەها یاریزانەکانی هەڵبژاردەکەش بەردەوام ناوی نەیماریان لەسەر لێوە و وێنەی لەگەڵ دەگرن. 

 

کۆتایی هات؟ سەردەمانی نەیمارمان تێپەڕاند؟ بە دڵنیاییەوە نەخێر، نەیمار ڕەنگە یاری نەکات لە ئێستادا، بەڵام بوونی خۆی و هێزە میدییایەکەی پشتەوە بەردەوام یاریزانەکە لە هزری هاندەران دەهێڵێتەوە و ڕەنگە دوای پێکانەکەی جارێکی دیکە بانەری کاپتنی هەڵبژاردەی بەڕازیل لە قۆڵ بکاتەوە.