پۆرتوگال لەبەردەم تاقیكردنەوەیەكی زەحمەتدایە

ئاڤا سپۆرت

هەڵبژاردەی پۆرتوگال ئەمڕۆ لە تاقیكردنەوەیەكی زەحمەتدا لە گەری دووەمی یاریەكانی كۆموڵەی شەشەم،  ڕووبەڕووی هەڵبژاردەی توركیا دەبێتەوە یارییەكە لە یاریگەی سیگنال ئیدۆناپاركە.

وێنە گەورەكە: هەردوو هەڵبژاردەكە دەیانەوێت بە بردنەوە لەم یارییە گەیشتن بە قۆناغی 16 مسۆگەر بكەن، چونكە یاریی یەكەم پۆرتوگال بە ئەنجامی( 2-1) لە چیكی بردەوە، بەڵام بە ئاستێكی چاوەڕوانەكراو دەركەوتن و بە زەحمەت هەڵبژاردەی چیكیان تێپەڕكرد، لەبەرامبەردا هەڵبژاردەی توركیا بە ئەنجامی (3-1) لە جۆرجیا بردەوە ئامادەی خۆی لە یۆرۆدا ڕاگەیاند.

ئەوەی پێوستە بیزانیت: هەڵبژاردەی پۆرتوگالی پاڵەوانی 2016 بە سەركردایەتی كریستیانۆ ڕۆناڵدۆ ئاستێكی باوەڕپێكراوی بەرامبەر چیك پێشكەش نەكرد، بۆیە ئەمشەو بۆ رۆناڵدۆ تاقیكردنەوەی دووەمییەتی لە یۆرۆی 2024ـدا.
لە لایەكی دیكەوە: هەڵبژاردەی توركیا بە سەركردایەتی ئاردە گولەری یاریزانی لاوی تیپەكە بە ئاستێكی نایاب بەرامبەر جۆرجیا دەركەوتن و لەو یارییەش گۆلێك و ئەسیستێكی تۆماركرد.

هۆكارە زانراوەكان: هەڵبژاردەی توركیا دەیەوێت ئەو گرێكوێرەیەی ئەنجامە خراپەكانی بەرامبەر پۆرتوگال بكاتەوە، چونكە لە 3 یاریی ڕابردووی نێوانیان لە یۆرۆی 1996 و 2000 و 2008 پۆرتوگال توانیویەتی لە توركیا بباتەوە.

ئەوەی لەبارەیەوە دەگوترێت: مارتینێزی ڕاهێنەری پۆرتوگال لەسەر یارییەكەیان بەرامبەر توركیا وتی: ئەم یارییە بۆ ئێمە چارەنووسسازە، چونكە بە بردنەوە دەگەینە قۆناغی داهاتوو جگە لەوەش لەسەر رێگا ڕاستەقینەكە دەڕۆین و بەربەستی سەختەمان نایەتەپێش، بەڵام دەزانین ئەركمان قوورسە چونكە ڕكابەرەكەی ئێمەش بەدوای بردنەوەدا دەگەڕێت.

لێدوانی فەرمی: لەبەرامبەردا مۆنتێلای ڕاهێنەری هەڵبژاردی توركیا، سەبارەت بە ڕووبەڕووبوونەوەی پۆرتوگال گوتیو ئێمە تیپێكی ئامادەین، دەزانین هەلبژاردەی بەرامبەرمان بەهێزن و خاوەن ئەستێرەن، بەڵام ئێمە بە گیانێكی بەرز و بە پلانی تایبەت ڕووبەڕوویان دەبینەوە و ترسمان لە هیچ هەلژباردەیەك نییە.