ڕۆناڵدۆ لێدانی سزای لەدەستدا بەڵام پۆرتوگال بردییەوە

ئاڤا سپۆرت

پۆرتوگال بە بردنەوە لە ئێرلەندا سێیەم بردنەوەی لەسەریەکی بەدەستهێنا.

چیرۆکی سەرەکی: پۆرتوگال لە یاریی پاڵاوتنەکان بۆ گەیشتن بۆ مۆندیالی 2026، سێیەم بردنەوەی لەسەریەکی بەدەستهێنا و هەڵبژاردەکەی ڕۆناڵدۆ بە گۆڵێکی بێوەڵام لە هەلبژاردەی ئێرلەندای بردەوە.
 
زانیاریی زیاتر: یارییەکە لە نێو یاریگای جۆزێ ئالڤالادێ لە شاری لێشبۆنە  و  بە ئامادەبوونی زیادتر لە 48 هەزار هاندەر بەڕێوەچوو، پۆرتوگال، بە شێوەیەکی نایاب دەستی بە یارییەکە کرد و تەنیا لە گێمی یەکەمدا 13 لێدانی ئاڕاستەی گۆڵی ئێرلەندا کرد، بەڵام سەرەڕای هێرشە بەردەوامەکانی پۆرتوگالی میواندار، نیوەی یەکەم بە یەکسانی و بەبێ گۆڵ کۆتایی هات.

لە گێمی دووەم: پۆرتوگال لەسەر هەمان ئاستی بەرز مایەوە و لە خولەکی 75 لێدانێکی سزا بۆ هەڵبژاردەکە هەژمارکرا، بەڵام جیاواز لە جارەکانی دیکە، ئەمجارە کریستیانۆ ڕۆناڵدۆ لێدانە سزاکەی فەوتاند و هەڵبژاردەکەی لە پێشکەوتن بێبەش کرد. بەڵام دواجار لە دوایین ساتی یارییەکە، ڕوبن نێڤێش قەرەبووی لێدانە سزاکەی کردەوە و گۆڵی یەکەم و پێشکەوتنی پۆرتوگالی تۆمارکرد.

ئەوەی پێویستە بیزانیت: بەو شێوەیەش یارییەکە کۆتایی هات و پۆرتوگال سێ خاڵی دیکەی بۆسەر حسابەکەی زیاد کرد، ئێستاش بە کۆی 9 خاڵ لە پێشەنگی کۆمەڵەی شەشەمە.