پۆرتوگال بە سەرکردایەتی ڕۆناڵدۆ میوانداریی ئێرلەندا دەکات

ئاڤا سپۆرت

پۆرتوگال لە پاڵاوتنەکانی جامی جیهانیی میوانداریی هەڵبژاردەی ئێرلەندا دەکات.

چیرۆکی سەرەکی: پۆرتوگال ئەمشەو لە یارییەکانی پاڵاوتنەکانی ئەوروپا بۆ گەیشتن بە مۆندیالی ساڵی داهاتوو، بە سەرکردایەتی ڕۆناڵدۆ و بە هیوای زوو گەیشتن بە مۆندیال، کاتژمێر 9:45 لەنێو یاریگای خۆی ڕووبەڕووی هەڵبژاردەی ئێرلەندا دەبێتەوە.

زانیاریی زیاتر: پۆرتوگال، لە پاڵاوتنەکاندا دوو یاریی ئەنجامداوە و هەردوو یارییەکەشی بردووەتەوە، ئێستاش هەڵبژاردەکەی ڕۆناڵدۆ خاوەنی شەش خاڵە و خۆی لە پێشەنگی کۆمەڵەی F دەبینێت. ئێرلەندایش هیچ یارییەکی لە پاڵاوتنەکان نەبردووەتەوە و خاوەنی یەکسانبوونێک و شکستێکە، هەڵبژاردەکە بە دوای یەکەم بردنەوەیدا دەگەڕێت، بەڵام بەرامبەر ڕۆناڵدۆ و هاوڕێکانی ئەرکی یەکجار سەخت دەبێت.

زیاتر بزانە: پۆرتوگال لە دوایین پێنج یارییدا تامی شکستی نەکردووە و خاوەنی چوار بردنەوە و یەکسانبوونێکە، ئەمشەویش هەڵبژاردەکە هەوڵ دەدات درێژە بە ئەنجامەباشەکانی بدات و لە سەر ڕێڕەوی بردنەوەکان بمێنێتەوە.

لە لایەکی دیکەوە: کریستیانۆی تەمەن 40 ساڵ دەیەوێت ژمارەی گۆڵەکانی لەگەڵ هەڵبژاردەکەی زیادتر بکات، دۆن لە ئێستادا لە کۆی 223 یاری بە درێسی پۆرتوگالەوە، توانیویەتی 141 گۆڵ تۆماربکات و بەوەش خاوەنی ڕیکۆردی زۆرترین گۆڵە لەگەڵ هەڵبژاردەکان، کریستیانۆ دەیەوێت ئەو ژمارە زیادتر بکات و لە گۆڵی ژمارە هەزار نزیکتر ببێتەوە.