مانچستەر یونایتد گەڕایەوە سەرکەوتن

ئاڤا سپۆرت

مانچستەر یونایتد لە گەڕی حەوتەمی پرێمەرلیگ، ڕێچکەی سەرکەوتنی دۆزییەوە.

چیرۆکی سەرەکی: مانچستەر یونایتد لە گەڕی حەوتەمی پرێمەرلیگ لەنێو یاریگای ئۆڵد ترافۆرد میوانداریی سەندەرلاند کرد، شەیتانەسوورەکان بە دوو گۆڵی بێوەڵام یارییەکەیان بردەوە و چێژی سەرکەوتنیان کرد.

زانیاریی زیاتر: پێش یارییەکە باس لە دەرکردنی ئەمۆریم دەکرا و ڕاهێنەرەکە گوشارێکی زۆری لەسەر بوو، بەلام یارییەکە دەستی پێکرد و مانچستەر یونایتد بە ئاستێکی بەرزەوە دەرکەوت، یانەکە توانی زوو گورزی خۆی بووەشێنێت و لە خولەکی 8 مەیسن ماونت گۆڵی یەکەمی شەیتانە سوورەکانی تۆمارکرد.

زیاتر بزانە: مانچستەر یونایتد بە دوای ئەو گۆڵەش لەسەر هەمان ئاستی بەرز مایەوە و درێژەی بە هێرشەکانی دا، تاوەکو لە خولەکی 31 بێنیامین شێشکۆ جیاوازییەکەی بۆ مان یونایتد کرد بە دوو هێندە و گێمی یەکەم بەو ئەنجامە کۆتایی هات.

لە گێمی دووەم: مانچستەر بەو ئاستە درێژەی بە یارییەکەدا، بەڵام نەیانتوانی هەلەکان بقۆزنەوە و گۆڵی زیاتر تۆمار بکەن، یارییەکە تاوەکو فیکەی کۆتایی بە هەمان ئەنجام مایەوە و سێیەم بردنەوەی لە وەرزەکەدا بەدەستهێنا، بەو بردنەوەیەش تیمەکەی ئەمۆریم هاتە پلەی نۆیەمی ڕیزبەندییەکە.