ئارسناڵ بردنەوەیەکی زەحمەتی بەدەستهێنا

ئاڤا سپۆرت

لە درێژەی یارییەکانی گەڕی شەشەمی پرێمەرلیگ، ئارسناڵ لە یاریگای ئیماڕات میوانداری لیستەر سیتی کرد، یارییەکەشی بە چوار گۆڵ بەرامبەر بە دوو گۆڵ لێبردەوە و خاڵەکانی لەگەڵ مانچستەر سیتی یەکسانکردەوە.

چیرۆکە سەرەکییەکە: گەنەرز لە گێمی یەکەم بە تەواوی کۆنتڕۆڵی یارییەکەی کردبوو، لە خولەکی 20 لە ڕێگەی مارتینێلی گۆڵی یەکەمی تۆمارکرد، ئارسناڵ هەر بەمە نەوەستا و لە کاتی زیادکراوی گێمی یەکەم گۆڵی دووەمیشی لە ڕێگەی ترۆسارد تۆمارکرد، گێمی یەکەم بەم ئەنجامە کۆتایی هات. 

لە لایەکی دیکەوە: گێمی دووەم هەر دوای دوو خولەک جەیمس جەستن گۆڵێکی بۆ لیستەر سیتی تۆمارکرد و جیاوازییەکەی کەمکردەوە، دوای ئەم گۆڵە تۆپهاوێژەکانی لەندەن بەردەوام بوون لە هێرشەکانیان و چەندین هەلی مەترسیداریان ڕەخساند، بەڵام هێرمانسنی گۆڵپارێزی لیستەر بەرپەچی هەموو هێرشەکانی دایەوە.

زانیاریی زیاتر:  خولەکی 63 بەشێوەیەکی چاوەڕوانکراو جەیمس جەستن، بەشێوەیەکی ناوازە گۆڵی دووەمی خۆی و لیستەری تۆمار و ئارسناڵیان شۆک کرد، بەڵام ئارسناڵ کۆڵی نەدا و لە کاتی زیادکراودا دوو گۆڵی تری تۆمارکرد، بەشێوەیەکی کاتی چووە پلەی سێیەمی ڕیزبەندی.